انتقل للمحتوى

الأسئلة الشائعة

أجوبة قصيرة لأصحاب السيارات وللورش والمحلات.

أسئلة أصحاب السيارات

التطبيق مجاني لأصحاب السيارات؟

إي، التسجيل واستخدام التطبيق مجاني لأصحاب السيارات، والتطبيق ما ياخذ عمولة. وأجور الخدمة أو سعر القطعة تدفعها لصاحب العرض مباشرة حسب اتفاقكم.

شلون أدفع للورشة أو المحل؟

الدفع يكون مباشرة بينك وبين مقدم الخدمة، نقداً أو بالطريقة اللي تتفقون عليها. ماكو دفع إلكتروني داخل التطبيق.

موقعي ورقمي يبينون للكل؟

لا. التطبيق ما يطلب موقعك الدقيق، تكتب اسم منطقتك بس، وهذا يشوفه المحلات المختصة بطلبك. ورقمك ما يبين بالتطبيق لأي محل إلا بعد ما تقبل عرضه.

شنو يصير إذا ما عجبني أي عرض؟

إنت مو مجبور تقبل أي عرض. كل طلب يستقبل لحد 7 عروض حتى تبقى المقارنة واضحة، وإذا ما ناسبتك تگدر تتركها، أو تلغي الطلب وترسل طلب جديد بتفاصيل أوضح.

مزاد الصيانة يضمن شغل الورشة؟

مزاد الصيانة يوصلك بمقدم الخدمة، بس مو طرف بالاتفاق بينكم ولا يعطي ضمان من عنده. إذا العرض بيه ضمان، يكون حسب شروط مقدم الخدمة.

شسوي إذا صارت مشكلة بعد الشغل؟

تگدر تقدّم شكوى من التطبيق: من «طلباتي» تختار الطلب وتضغط «تقديم شكوى»، والإدارة تراجعها وتتواصل ويّا الطرفين. وإذا تريد تفتح نزاع على شغل خلص أو انلغى، عندك 3 أشهر من اكتمال الشغل أو إلغائه.

أگدر أحذف حسابي وبياناتي؟

إي، تگدر تطلب حذف الحساب من الإعدادات أو من صفحة حذف الحساب، وبعدها تبدأ مهلة 10 دقائق تگدر تتراجع خلالها. بعد المهلة يتسكّر الحساب ويتشال اسمك وسياراتك، بس تبقى سجلات مثل رقم الموبايل والطلبات والمحادثات والتقييمات والصور. التفاصيل بسياسة الخصوصية.

أسئلة الورش والمحلات

شلون أسجّل ورشتي أو محلي؟

حمّل تطبيق «مزاد الصيانة | للورش»، وسجّل برقم موبايلك واسم محلك واسمك، واختار أقسام الخدمات اللي تشتغل بيها. بعدها تشوف طلبات الزبائن بهالأقسام. حساب المحل منفصل عن حساب الزبون، وتگدر تستخدم نفس رقم موبايلك بالتطبيقين.

كم عرض أگدر أقدّم على الطلب؟

عرض واحد على كل طلب، وتگدر تعدّله أو تسحبه قبل ما الزبون يقبله. وكل طلب يستقبل لحد 7 عروض؛ إذا اكتمل العدد يتوقف التقديم عليه، وإذا انسحب عرض ينفتح مكان من جديد.

متى يبيّنلي رقم الزبون؟

بعد ما الزبون يقبل عرضك، يبيّنلك رقمه بصفحة الشغل، وتگدرون تكملون المحادثة داخل التطبيق.

أكو عمولة على الطلبات؟

لا، التسجيل واستخدام التطبيق مجاني للورش والمحلات، وماكو عمولة على العروض أو الشغل. وماكو دفع إلكتروني داخل التطبيق، الحساب يكون مباشرة بينك وبين الزبون.

شنو يصير إذا زبون اشتكى على شغلي؟

الإدارة تراجع الشكوى والمحادثة داخل التطبيق وتفاصيل العرض، وتتواصل ويّا الطرفين. وحسب المراجعة ممكن تنبيه، أو إيقاف مؤقت، أو حظر للحساب اللي يخالف الشروط أو الاتفاق.

أگدر أشتغل من الكمبيوتر؟

إي، نفس حسابك يشتغل من المتصفح على الكمبيوتر، وتشوف نفس الطلبات والعروض.

أسئلة عامة

أي تطبيق أنزّل؟

إذا عندك سيارة، نزّل «مزاد الصيانة». وإذا عندك ورشة أو محل قطع غيار أو تقدّم خدمة للسيارات، نزّل «مزاد الصيانة | للورش». كل تطبيق إله حساب منفصل، وتگدر تستخدم نفس رقم موبايلك بالاثنين.

مزاد الصيانة يصلّح السيارات أو يبيع القطع؟

لا. مزاد الصيانة منصة توصل طلبك للورش ومحلات قطع الغيار ومقدمي الخدمة المسجّلين، وهمّ اللي يقدّمون العروض وينفّذون الشغل.

وين يشتغل مزاد الصيانة؟

تطبيق مزاد الصيانة متاح بكل محافظات العراق، والعروض تعتمد على وجود محلات ومقدمي خدمات بالمنطقة.

ما لگيت جوابك؟

تواصل ويانا على واتساب، أو ابدأ من التطبيق المناسب إلك.

اختار تطبيقك

عندي سيارة

مزاد الصيانة
تعرّف على تطبيق الزبون

عندي ورشة تصليح أو محل قطع غيار

مزاد الصيانة | للورش
تعرّف على تطبيق المحلات